العناية باليدين و القدمين

الايدين و القدمين من اهم ما يميز اي هانم ؛ و الاهتمام بيهم دا اساسي :

مش لازم تروحي للكوافير او تطلبي حد يعمله لك ؛ اولا لان دا شئ سهل جدا اننا نفذه بنفسنا ؛ ثانيا انه مكلف لو عملتيه برة ؛ ثالثا كونك انتي اللي بتعملي دا بنفسك لنفسك هيديك ثقة انك ست هايلة ؛ و متميزة عن اي حد مبيعرفش ينفذه :)

بدايةً بنشيل اي طلاء اظافر على ضوافر ايديكي و رجليكي .

١-هنجيب اي وعاء نخصصه للرجلين ؛ و وعاء اصغر منه للايدين ؛ هنحط فيهم مية سخنة لاقصى حد ممكن تتحمليه بدون الم ؛ و نحط مع المية شوية شامبوو و معلقة بيكربونات الصوديوم ؛ و مش عاوزة واحدة تقولي ايه البيكربونات دي :D

فايدة البيكربونات انها بتعمل على ازالة اللون الغامق للجلد و بيوحد لونه .

٢- بنحط القدميين و الايدين في المية دي لمدة لا تقل عن عشر دقايق .

٣-بعد العشر دقايق بيكون الجلد الكيراتوتيك او الميت تشرب من المية و بقا طري اوي من المية السخنة :

أ-القدمين:

---------

بنجيب مبرد القدمين او الحجر الطبي و نبتدي نبرد الجلد كويس جدا جدا ابتداءاً من منطقة الكعب لباطن القدم للاصابع ؛ نبرد كويس جدا و نشيل كل الجلد الميت .

نجيب فرشة اسنان نخصصها للباديكير و ننضف بيها كويس الضوافر و تحتها و الحد الفاصل بين الضوافر و الجلد .

نشطف القدمين كويس بالمية الفاترة و ننشفهم.

بعد كدا هنعمل مزيج من الفازلين و مرهم سالسليك (بيتباع في الصيدليات) و زيت زيتون و جلسرين ؛ و نمزجهم كويس جدا جدا و ندلك بيهم القدمين كويس .

نجيب كيس بلاستيك بتاع التلاجة دا و نلبسه في كل قدم بعد ما ندهن المزيج دا ؛ و فوق الكيس البلاستيك نلبس شراب ؛ و نسيبهم كدا مدة لا تقل عن ساعة كاملة.

هه؟ اتفقنا على اييييييييه ؟ مش سهل ابدا انك تكوني انثى جميلة :)

ب-اليدين :

-----------

بعد ما نقعنا ادينا في المية السخنة و البيكربونات و الشامبوو لمدة عشر دقايق على الاقل ؛  هنشيلهم بقا من المية ؛ و طبعا مينفعش نستخدم معاهم لا المبرد و لا الحجر :D

طيب نعمل ايه ؟ 

بنكون مجهزين مزيج من السكر او ملح السفرة الخشن و نعجنه بعصير ليمون و جلسرين ؛ و نعمل سكرب جامد بالمزيج دا للايدين ؛ و مننساش نهتم بالمنطقة االي حوالين الضوافر .

بعد كدا بنشطف اليدين ؛ و بنجيب فرشة اسنان نخصصها للايدين و ننضف بيها الضوافر : تحتها و حواليها كويس ؛ و نشطف الايد تاني .

بعد كدا بنجيب عصير ليمون بس و ندلك بيه الايدين كويس اوي لمدة متقلش عن دقيقة كاملة ؛ بعدها نشطف الايدين كويس اوي بالماء الفاتر ؛ و ننشفها .

بندهن ايدينا بمزيج من زيت الزيتون و الليمون و الجلسرين ؛ و نلبس كوانتي لاتكس او بلاستك عليها بردو لمدة لا تقل عن ساعة .

الليمون بينضف البشرة و بيفتح لونها و بيوحده ؛ و زيت الزيتون هايل لترطيب البشرة و مفيد جدا جدا للضوافر و بيقويها و بيمنع تقصفها و تشققها .

***

بعد ساعة بنشيل الجوانتيات و الشرابات البلاستيك و هتمسحي ضوافرك بقطنة مبللة بمنظف اظافر ؛ و تبتدي تحطي ال nail polish

بكدا تكوني عملتي مانيكيير و باديكيير احسن من اللي بيتعمل لك في المحلات :)

امثلة لل daily scrubs

اتكلمنا في البوست اللي فات عن تنضيف البشرة و قولنا اننا المفروض نعمل daily scrub

النهاردا هنتكلم عن امثلة الد daily scrubs علشان في ناس مش عارفاها .

في انواع كتيير جدا جدا متوفرة في السوق و سعرها هايل جدا ؛ يعني مش مكلفة خالص 

احنا هندي هنا كام مثال بس ممكن تستخدميهم كبداية ؛ بعد كدا كل هانم هتعرف افضل نوع بيريح بشرتها و هتكمل معاه .

١- clean & clear daily scrub

و دا جميل اوي اوي و هايل بصراحة 

٢-Garnier daily scrub

٣-cyclax

٤-Reo

بس مشكلة ريو انه دهني شوية و كريمي ؛ يعني بياخد وقت شوية في الشطف

دول موجودين دايما في السوق يعني مش هتغلبي علشان تلاقيهم ان شاء الله

التنضيف اليومي للبشرة

البوست دا هنتكلم فيه عن ابسط نظام يومي للعناية بالبشرة :

في بنات كتيير للاسف مبيعرفوش ان التنظيف اليومي للبشرة و العناية بيها اهم شئ لازم الست تقوم بيه ؛ دا اعتبريه اهم تاسك هتقومي بيه في اليوم كله ؛ مهما كانت ظروفك لازم تعمليه :

١-الصبح :

************

اول ما نقوم من النوم ؛ هنغسل وشنا كويس لمدة دقيقة كاملة على الاقل بصابون بس ؛ و ننشف كويس بالفوطة و بعدين نحط كريم نهاري مرطب ضد الشمس ؛ فيه نسبة حماية واقية من الشمس .

اشعة الشمس اسوء شئ للبشرة ؛ لانها اولا بتسبب الجفاف ؛ ثانيا ان تأثير الاشعة بيكسر روابط بروتين الكولاجين تحت الجلد ؛ و دا بيأدي لترهله .

يعني لو جيبنا اتنين توأمين ؛ واحدة عرضناها للشمس كتير و بدون كريمات واقية و واحدة مبتتعرضش كتيير للشمس و بتستعمل كريمات حماية ؛ هنلاقي اللي بتتعرض للشمس كتير ظهرت عليها تجاعيد شخوخة قبل اختها و نسبة التجاعيد كمان هتكون اكبر و اعمق.

و التعرض للشمس مش بس انك تقفي او تمشي تحت الشمس مباشرة ؛ لا حتى لو انتي في عربية او مكان مفتوح ؛ او شارع حتى لو ماشية في الضل ؛ الاشعة موجودة و بتأثر .

يبقا اهم شئ في فترة الصبح اننا نستعمل كريم واقي ضد الشمس بنسبة معقولة و يكون مرطب في نفس الوقت علشان يعوض الجفاف اللي هيحصل نتيجة خروجنا للشارع.

في كريمات كتير ممكن تؤدي الغرض ؛ زي olay complete day cream

لو هتحطي ماك آب ؛ يبقا هتحطي الكريم قبل الماك آب بنص ساعة على الاقل علشان يكون حصل امتصاص تام للكريم .

يعني هنقوم من نومنا نغسل وشنا و نحط الكريم اول حاجة ؛ بعد كدا هنفطر ؛ نرتب البيت و نلبس ؛ و نحط الماك آب ؛ بكدا يكون فات اكتر من نص ساعة بين وضع الكريم و الماك آب و متعطلناش بردو :)

٢-بعد الضهر :

******************

بعد الضهر نقصد بيها بعد ما نكون خلصنا خروجة الصبح سواء رجعنا من الشغل او من الشوبينج او جيبنا الولاد من المدرسة ؛ او لو مخرجناش من البست يبقا على حدود الساعة اتنين مثلاً :

طبعا هنكون تعبانين و حاسين اننا متربين ؛ مش ممكن هنيجي من برة و مش هناخد شاور او على الاقل نغسل وشنا ؛ صح ؟

بعد الضهر تنضيف خاص شوية لاننا جايين من وسط مترب و ملوث اللي هو الشارع ؛ و بشرتنا مجهدة من دا كله و من تعرضها للشمس .

هنغسل وشنا بالصابون زي الصبح و نشطفه بالمية كويس نشيل اثار الصابون ؛ و بعدها نستعمل اي daily scrub

هتعملي السكرب بعد الشطف على طول و وشك لسا مبلول ؛ هتبتدي تدلكي وشك بالسكرب بحركة دائرية ؛ بحيث نزيل كل اثار التراب و كمان نشيل طبة الكيراتين اللي بتتكون على جلدنا ؛ اللي بيسموها الجلد الميت .

نشطف بعد كدا بالنية كويس اوي اوي لغاية ما نحس ان كل اثار السكرب راحت بالمية و ننشف وشنا كويس اوي بالفوطة ؛ باد السكرب هتحسي بفرق كبير جدا على بشرتك : هتحسيها انضر و انعم و هتحسي انها بقت الى حد ما متجانسة homogenous 

بعد ما نشفنا وشنا نحط كريم نهاري مرطب يكون فيه نسبة كولاجين ؛ علشان نعوض جفاف البشرة و نعوض الكولاجين الطبيعي اللي اتأثرو بخروجنا في الشمس ؛ و اللي بيفقدو طبيعي مع السن ؛ لتزم نعوضهم من مصدر خارجي .

في كريمات كتير اوي موجودة بتتعامل مع اثار السن ؛ بتكون محتوية على الكولاجين :

Pond's age miracle day cream

Olay total effect

L'Orèal retiva lift day cream

٣-بالليل:

***********

العناية الليلية بالبشرة مهمة جدا ؛ لان البشرة اثناء النوم بتكون عندها قدرة كبيرة على الامتصاص و خلاياها عندها قابلية للتجديد regeneration 

على اخر الليل قبل معاد نومك بساعة او نص ساعة ؛ هنغسل وشنا بالصابون بس زي الصبح ؛ و ننشفه كويس ؛ و نحط كريم الليل بتاع نفس كريم الضهر ؛ بمعنى انك لو حطيتي الضهر كريم النهار بوندز ايدج ميركل ؛ يبقا تحطي بالليل كريم الليل بتاع بوندز ايدج ميركل ؛ لو حطيتي الضهر كريم النهار لوريال ريتفا ؛ يبقا تحطي بالليل كريم الليل بتاع لوريال ريتفا ؛ فهمنا ؟ خلاص ؟ 

بكدا نكون خلصنا ال daily schedule للعناية بيشرتنا ؛ و ارجو اكون اتوفقت في الشرح :)

اساسيات في تنضيف البشرة

في اساسيات و ثوابت في عملية تنضيف البشرة لازم نقولها و نعرفها كويس علشان منكررهاش تاني :)

١-لما نتكلم عن تنضيف البشرة و نقول نغسل وشنا : كلمة ”الوش“ هنا منقصدش بيها محيط الوجه بس ؛ لا ؛ دي نقصد بيها (الوجه + الرقبة + الايدين) .

الوش و الرقبة و الايدين دول اعتبريهم جزء واحد ؛ لو اهتميتي بوشك بس هتلاقي مع الوقت رقبتك و ايديكي ترهلو و بشرتهم بقت غير صحية و وشك لسا محتفظ بنضارته و دا بيدي منظر وحش جدا جدا ؛ بيدي شكل fake 

يعني هتحسي انك لابسة ماسك ؛ تمام ؟ اتفقنا في النقطة دي ؟

ننقل على اللي بعدها :

٢-نستعمل صابون طبي ؛ لانه بيكون الى حد كبير متعادل في ال ph

اي صابون تاني بيسبب جفاف للبشرة مع الوقت حتى لو الدعاية بتاعته هتقولك غير كدا او هتقولك ان فيه كريم و و و ؛ كل دا كلام تجاري بحت ؛ الصابون الطبي العادي في اي صيدلية أأمن كتير لبشرتك حتى لو ارخص .

٣-لو هتاخدي دقيقة في تنضيف وشك بالصابون ؛ يبقا يلزمك دقيقة زيها علشان تشطفيه بالمية ؛ الشطف بالمية مهم جدا لانه بيزيل اثار الاتربة و الاهم انه يزيل تماما اي اثر لصابون التنضيف .

٤-مية الشطف متكونش دافية ؛ حتى في الشتا ؛ تكون مية فاترة ؛ و اقرب للبرودة منها للدفء ؛ بس بردو مقبولة ؛ لان المية الساقعة بتعمل انقباض للمسام و الاوعية الدموية و بتحسن حالة الجلد ؛ المية الدافية على العكس ممكن تسبب جفاف البشرة ”القشف بلغة العوام“ :)

٥-لو هنعمل سكرب للبشرة ؛ يبقا و انتي لسا وشك مبلول بتحطي شوية اسكرب على ايديكي المبلولة و تبتدي تدلكي وشك بالسكرب في حركات دائرية ؛ اوعي اوعي تعملي سكرب على بشرة جافة.

٦-التنشيف الجيد جدا جدا بالفوطة ؛ متسيبيش نقطة مية على وشك ؛ قبل ما تخرجي من الحمام يكون وشك ناشف تماما ؛ لان دا بيمنع تشقق البشرة و تمنع ما يسمى باللغة الدارجة ”القشف“

تنشيف البشرة بالفوطة يكون برقة بطريقة الطبطبة كدا ؛ متفتريش بالفوطة و تفركي بشرتك :D

يلا نتفق

اهلا بيكم في المدونة :)

دا اول بوست فيها ؛ اولاً اتمنى انها تعجبكم و نستفيد كلنا ان شاء الله ...

ثانيا لازم نتفق ان علشان تكوني انثى فعلا دا شئ صعب و متعب ؛ لكن النتيجة النهائية تستحق اننا نتعب علشان نوصلها .

لازم تكوني متعلمة كويس و مثقفة ثقافة واسعة و ربة بيت ممتازة و في نفس الوقت تكوني انيقة و رشيقة و جميلة طول الوقت :)

مفيش مستحيل طول ما في ارادة ؛ المهم تكوني عاوزة توصلي لشئ علشان توصلي له ان شاء الله .

حاجات بسيطة نبتدي نضمِّنها في روتين يومنا هتفرق معانا و هتحسي بانعكاسها على روحك من جواكي .

يبقا اتفاقنا اننا مش هنتعب و لا هنمل deal ؟ :)